O máis probable é que algúns
herdeiros dos históricos clans galegos do contrabando xa estean na
dirección correcta, demostrando gran axilidade; se outrora migraron sen
problemas do tabaco á coca, agora tamén. A crise é o que ten,
primeiro seméntase, énchese á sociedade de medos e pesimismo para
que emerxa o terror; derrotados e sen autoestima é moi fácil
traficar cos homes como se
fosen bestas. Os traficantes
coñecen o mecanismo, non desperdiciarán o botín; a mercadoría
está clara, os destinatarios tamén, a mocidade. Os vellos pero
remozados clans dispostos outra vez ao traballo, coma se fose un
“remake”. Coñecen a frialdade da cadea, non é a primeira vez, e
non lle teñen ningún medo. Arriscado, pouco ético? A falta de
moralidade non lles preocupa, carecen dela, acostumados ao delito
tamén a pagar por elo.
Deulles folgos o feito de que os
que nestes anos cometeron máis tropelías , os que máis meteron os
dedos na caixa, os que abocaron á sociedade a esta deriva, son
agasallados e as institucións coas que instrumentalizaron a súa
fazaña insufladas de adrenalina en vena de sangue humana. Vista a
crise da humanidade –a peor das crises- e coas miserias humanas ao
descuberto, camiñan fortalecidos, decididos a actuar, co único
oficio que coñecen, o tráfico de sustancias ilícitas. Decatáronse de que a alegría é un material
sumamente dopante, tan escaso ou máis que a droga máis aditiva,
quizais o único antídoto real para sobrevoar o abismo. Fai días
que deixaron correr a nova, e xa se ven pola rúa ringleiras de
persoas dispostas a facer de cobaia, en busca da correspondente dose
de alegría, sen ser conscientes do que lles espera, do mono que está
por vir, necesitarán máis e máis doses, e deberán volver a verlle
a cara a eses seres indesexables, avariciosos que sempre especularon
con todo.
*Publicado no xornal La Región o 1/12/2011
No hay comentarios:
Publicar un comentario