Hai bicos que son navallas, como o
que recibiu Erich Honecker de Gorbachov nos beizos aquel outubro do
1989, frío e protocolario, con desidia, cando o que necesitaba o
vello líder comunista alemán eran “mimos”. Un mes despois caeu
o muro de Berlín.Que lonxe daquel outro pasional e libidinoso
regalado por Brezhnev, tamén ruso, pero que nada que ver!
Conmemorábase daquela o trinta aniversario da extinta RDA, nese si
que houbo paixón, tanta que escandalizou aos outros líderes
europeos.
Bicar é saudable, estimula o
cerebro. O beneficio é mutuo, tanto para o que dá, como para o que
recibe, incluso para os miróns, que disfrutan de balde no goce
alleo. Hai bicos apaixonados, paternais, obscenos, de loucura,
eclesiásticos, inclusive de pésame. Tamén liberadores, os que se
relatan nos contos infantís, lembrade que Brancaneves ou a Bela
durminte espertaron despois de ser bicadas por un príncipe. Hainos
de traizón, o famoso de Xudas; ou de película, como en
“Casablanca”. Bicos que non esquecerás, ou eso din, o da
primeira vez. “No comment”. Bicos de solidariedade, nos antigos
réximes comunistas os mandatarios bicábanse na boca; os césares
romanos tamén, como mostra de recoñecemento. Hainos de foto, como o
parisino bico de Robert Doisneau , ou o non menos famoso de Alfred
Eisenstaedt, o da enfermeira bicada polo marine en Time Square trala
rendición de Xapón na segunda Guerra Mundial. Cada bico ten un
sabor diferente e cada cultura unha maneira de facelo, en protocolo
sábeno ben.
Tralo tsunami electoral do pasado
domingo Mariano Rajoy quixo regalarmos unha imaxe, tamén un bico,
non custan cartos. Pero seguro que non evitou que polo seu maxín
circulase outra imaxe, mesmo balcón, ano 2008, e el dicindo “terra
trágame”.
Publicado no Xornal La Región 24/11/2011
No hay comentarios:
Publicar un comentario