#Mataron a Fidel Castro

  A Fidel Castro mátano case que tódolos días. E sen empregar velenos, elixires, nin puros explosivos; nin que se saiba a CIA anda polo medio. Agora tócalle morrer virtualmente. O das redes sociais comeza a ser unha pantomima ao redor da información. A falta de mellor oficio agora  se lles suplanta a identidade a personalidades serias para anunciar a morte do dictador caribeño. Esta vez tocoulle a Luis de Guindos, como se o home non tivera xa suficiente, a Mario Monti, primeiro ministro italiano, e a Olli Rehn, máximo responsable de Economía e Finanzas da Unión Europea, aos que lles usurparon as contas en Twitter para anunciar a macabra nova.

    O problema das redes é que ante a falta de novas de interese, polémicas adolescentes, ou un evento deportivo de nivel o interese mingua e a conversa redunda nunha sorte de cacofonía en bucle, máis se proceden dun mesmo círculo. E xa non é a primeira vez que alguén lanza un sonoro ¡me aburro!, farto de escoitarse a si mesmo e aos da súa corda. Cando o interesante é o debate intelixente e que cada quen se exprese en liberdade e non apuntalar o bo rolo ou o peloteo enfermizo. Esta vez tocoulle a Fidel, a quen por cuestións biolóxicas non fai falla ser pitoniso para adiviñarlle o porvir, antes foron outros. Ao presidente Fraga estivérono matando durante anos, a derradeira vez a familia tivo que sacalo á rúa para que lle dera o sol e de paso parar os rumores. A verdade é que a nova, nada crible por certo, non deixa de ser un paradoxo, en que porcentaxe a información que inunda a rede ao marxe de ser crible é certa, e a quen se lle piden responsabilidades sobre a mesma. A este paso remataremos por reconstruír novamente a historia, difundir falsas teorías matemáticas na escola, encher as teses universitarias de falsidade achacándolle a responsabilidade dos nosos erros á wikipedia de turno ou ao twitter. A cuestión non é que a morte de Fidel sexa Trendings Topics, que non deixa de ser unha anécdota sen gracia, o problema é que implica moitas máis cousas.

Publicado no xornal La Región 8/03/2012