 |
| José Paz |
A vindeira
celebración do cumio do Banco Central Europeo (BCE) en Barcelona
fará que o Tratado de Schengen pase a ser papel mollado, polo menos
durante unha semana, a do 28 de abril ao catro de maio. O plan
previsto polo Ministerio do Interior que dirixe Jorge Fernández Díaz
pretende blindar as fronteiras con Francia para evitar a entrada dos
temidos antisistema, bendito eufemismo.
Non vou a entrar a
valorar a decisión, pero ao tratado en si, ratificado en 1985 na
cidade homónima luxemburguesa, que se nos vendeu coma un dos piares
da integración europea, fai tempo que lle están a tirar pedras de
xeito certeiro. A liberdade de circulación de persoas entre países
da Unión Europea era a mellor maneira de visualizar e exhibir a
realidade de Europa. Fai un ano exactamente que Sarkozy e Berlusconi
nunha cumbre italo-francesa verbalizaron ao unísono a necesidade
de reformar o devandito tratado para, naquela ocasión, tralas
revoltas árabes, que ámbolos dous gobernos alentaron, evitar que os
seus cidadáns fuxiran cara Europa por algunha das fronteiras dos
países do sur. Agora é Alemania a que xunto con Francia propoñen,
despois de afirmar outra vez máis a súa defensa, que é necesario
restablecer de xeito provisional os controis fronteirizos internos ao
marxe dos externos.
Fai tempo que
Schengen está baixo sospeita, a sempiterna sospeita dos
todopoderosos veciños do norte contra os do sur. Pode que o de
Barcelona non sexa máis ca unha metáfora do que está a acontecer.
Illar ao BCE das críticas e dos berros para que non teñan a
tentación de escoitar e flexibilizar unha postura teledirixida dende
Holanda, Austria e Alemania. A estas alturas a ninguén se lle
escapa que as pedras no tellado de Schengen son xestos cara os
electorados ultras que están cheirando as feblezas europeas
agardando a súa oportunidade populista. Non podo evitar as
semellanzas e pensar na fracasada República de Weimar e o ascenso de
Hitler ao poder; moitas das condicións xa se dan. E mudalas
Constitucións non é imposible.
*Publicado no xornal La Región 26/04/2012
