Media tarde en Bande, alto do Vieiro. Alcaldes, comuneiros, técnicos da Consellería e xornalistas agardan polo conselleiro de Medio Rural, Samuel Juárez, quen os convocou na zona para valorar os danos sufridos no incendio do pasado venres. Dende a estrada nacional N-540, a que une Bande e Celanova, a superficie queimada é moi visíbel; todos os camiños que conducen ao monte conservan aínda frescas as pegadas da maquinaria pesada que traballou na zona. Segundo a Consellería, a superficie queimada foi de 410 hectáreas, gran parte arborada, basicamente piñeiros e bidueiros. Tratábase dunha queima autorizada e controlada por persoal da propia Consellería. "Un erro no procedemento" diría ao chegar Samuel Juárez, "haberá que ver os fallos e despois se depurarán responsabilidades". Unha rengleira de coches oficiais diríxese apresurada ao punto de encontro, dun deles, sae o conselleiro, escrupulosamente peiteado, chaqueta gris con raias negras cruzadas, garabata, camisa branca a cadros e uns inmaculados mocasíns negros. Tralas declaracións ao pé do monte queimado o conselleiro dirixirase ao monte. "Se depurarán responsabilidades", a modo de eco, repítense entre elas as árbores queimadas. Os mocasíns do conselleiro, pensan o mesmo.