Se fose ministro non iría aos touros # Galego

José Paz

  O verán é para descansar, baixar a garda e deixarse de lerias, salvo que vivas da política e teñas que andar no tallo como alma en pena na procura de porvir. Antes, nos bos tempos, os ministros e conselleiros facían gardas e se alternaban entre eles para non deixar a casa desatendida. Agora non. Que o ministro Cañete golfeaba é unha evidencia, unha verdade prístina. El andaba de incógnito polo territorio adiante, e tamén nos touros mentres o país ardía, incluídos tres parques nacionais –Doñana, Garajonay e Cabañeros-. Foi aos touros por orden de Presidencia, tocoulle a el acompañar ao Rei –outro que xa non descansa- na corrida do Puerto de Santa María. Cañete obedecía ordes, claro que si, ademais, pola temática en cuestión, sempre mellor mandar a un ministro de agricultura que a un de xustiza por exemplo, aínda que o país arda, e non metaforicamente.
   Rajoy tamén estaba de días, ao diste ano en Pontevedra non se lle pode chamar doutro xeito, ademais coa oposición sempre tirando do rabo. Pena de país, que tempos aqueles de veraneos bronceados de Aznar ou de Zapatero, éramos outros. Agora nin puro en público con palmadiñas nas costas, nin touros, nin festas da Peregrina. Tampouco se toma un respiro Feijoo, aínda que estea oculto, salvo cando acudiu por Valdeorras para ver os restos calcinados dese Santigoso sempre activo. E non con aquel ridículo anaco de mangueira antesala dos recortes por vir, senón para dar o “pésame” pola pira montada e desmontar de paso a liorta deseñada pola oposición tocapelotas insistente en falar coma sempre de falta de coordinación, externalización de operativos e outras vainas. É que este país arde, sempre arde, e non polo lume, é que nos gusta queimalo.

*Publicado en La Región 16/08/2012